TAKE 7 - Hejmpaĝo

20-a de julio : Oka novaĵletero sendita (supren)

Saluton karaj TAKE7-anoj !

Baldauxas la kongreso, kaj eble kelkaj el vi jam estas survoje. Jen kelkaj lastminutaj informoj :

- Ni estos en UQAM, 320 Ste-Catherine Est (Oriente), en cxiu tago, de la 11a gxis la 18a de Julio, inter la 09a horo kaj la 17a horo.

- Ni estos en Bistro Sanguinet, 308 Ste-Catherine Est (Oriente), la 11an kaj la 17an de Julio, inter la 19a horo kaj la 22a horo.

- Ni estos en Kolegio Vieux-Montreal, 255 Ontario Est (Oriente), la 12an, la 14an kaj la 15an, inter la 19a horo kaj la 22a horo, kaj la 13an inter la 17a horo kaj la 22a horo. La cxambro estas 4-82A, en la 4-a etagxo.

- En kazo de problemo, aux se vi alvenas je malsamaj horoj, bonvole voku nin :

514-802-1534 aux 514-296-9762

Pri la programo : Kelkaj pliaj informoj aperis hodiaux en nia retejo : http://www.take7.ca/kalendaro-eo.html
Kompleta programo estos disdonata surloke.

3-a de julio : Sepa novaĵletero sendita (supren)

Saluton!

Post unu semajno komencigxos TAKE7. Per tiu-cxi mesagxo, ni volas aparte atentigi al cxi tiuj informoj.

Al personoj kiuj flugos al Montrealo, ni rekomendas navedan buson "Aerobus" por atingi montrealan urbocentron. Gxi kostas 14$ (24$ ire kaj revene). Je alveno al la busstacio, se neniu atendas vin, bonvolu voki nin je unu el jenaj numeroj : 514-296-9762 aux 514-802-1534. La kongresejo estos malfermita ekde la 11a de Julio inter 9a kaj 17a.

Pri kiel atingi la kongresejon, bonvolu trarigardi la jenan retpagxon: http://take7.ca/kongresejo.html, aux presi la jenan dokumenton: http://take7.ca/antauxkongresalibreto.pdf.

La parkejo de UQAM estas malantaux la kongresejan konstruajxon, kaj kongresanoj estas bonvenaj uzi gxin. Gxi kostas po 12$ tage.

Por tiuj kiuj partoprenos la antauxkongresan ekskurson, bonvolu noti ke la rendevuo estos cxe la UQAM-Logxejo la 7an de julio je la 9a matene.

Adreso de la kongresejo:
Pavillon J.-S.-DeSève
320, rue Sainte-Catherine Est
Montréal, QC

Adreso de la UQAM-logxejo:
Résidences universitaires UQAM
303, boulevard René-Lévesque Est
Montréal, QC

Posxtelefonoj: 514-296-9762 (Boriso) kaj 514-802-1534 (Marteno)

16-a de junio : Sesa novaĵletero sendita (supren)

Saluton!

Jen la sesa novaĵletero pri la sepa Tut-Amerika Kongreso de Esperanto, okazonta en Montrealo (Kanado) de la 11-a ĝis la 18-a de julio 2008.

- Bankedo: Nun denove eblas aliĝi al la bankedo! Ni decidis ŝanĝi ĝian lokon por ebligi al pli da homoj partopreni en ĝi. Por aliĝi, bonvolu uzi la aliĝilon de nia retejo (http://www.take7.ca/aligxo.html); kaj, GRAVEGE, se vi jam aliĝis al la kongreso kaj deziras nur kromaliĝi al la bankedo, nepre alklaku la kvadrateton 'Mi jam aliĝis' -- tio simpligos nian laboron! Post la manĝo okazos aŭkcio de malfacile troveblaj esperantaĵoj profite al la Amerika Fondaĵo de UEA. Post tio aŭdiĝos la multlingva koncerto de JoMo. Dancemuloj povos danci dumkoncerte. Se vi ankoraŭ ne aliĝis, ne maltrafu tiun okazon bone amuziĝi!

- Programo: Aperos post unu semajno kompleta programo, kun priskriboj de prelegoj, laborgrupoj, ekskursoj kaj vesperoj. Ili estos ordigitaj ĉefe laŭ kvar fadenoj: kongrestema, ĝenerala, movada/kleriga kaj ekskursa.

- Ekzamenoj dum TAKE 7: Bonvolu tuj aliĝi, se vi volas ekzameniĝi dum TAKE 7. Estas du eblecoj:

Internaciaj ekzamenoj de ILEI/UEA: Ili estas tute en Esperanto. Kosto: pli malpli 50 $CAD, por kovri la ekzamenan materialon (surloka pago sufiĉos). Du niveloj: baza kaj meza. La ekzamenoj konsistas el tri partoj: gramatika, skriba kaj parola. Vi ricevos oficialan atestilon pri via lingva kapablo. La ekzamenoj okazos, kondiĉe ke sufiĉe da homoj aliĝos al ili.
Ekzamenoj de Usona Ekzamena Servo: Ili okazos angle. Tri niveloj: baza, meza, supera. Kosto 10 $USD. Ĉiu ekzameno daŭras proksimume du horojn. Sukcesintoj ricevos oficialan atestilon. Necesas antaŭanonci vin al la administranto Doroteo Holland (dorothyjeanh@gmail.com; telefone 805-967-5241).

- Ekskursoj: Rendevuoj por ĉiuj ekskursoj (antaŭkongresa, dumkongresa kaj postkongresa) estos antaŭ UQAM-Loĝejo (adreso ĉi-sube), je la 9-a horo matene.

- UQAM-Loĝejo: Tiuj, kiuj mendis pere de TAKE 7, nenion devos krompagi surloke. Estas kuireblecoj, sed por tio oni devas kunporti (aŭ surloke aĉeti) kuirilojn kaj manĝilojn, ĉar ilin la loĝservo ne provizas. Lit- kaj bantukoj, tamen, estas provizitaj en la ĉambroj. Je via alveno, vi povos enloĝiĝi nur post la 16-a horo (4-a ptm), kaj, tage de via foriro, vi devos liberigi la ĉambron antaŭ la 12-a (tagmezo). Jen la franca nomo kaj adreso de UQAM-Loĝejo:

   Les Résidences universitaires UQAM
     303, boulevard René-Lévesque Est
     Montréal H2X 3Y3
     Telefono: 514-987-6669

- Kongresejo: Vidu en nia retejo instrukciojn por atingi ĝin: http://take7.ca/kongresejo.html. Tie vi trovos ankaŭ ligon al guglo-mapo speciale preparita por TAKE. Jen la ekzaktaj franca nomo kaj adreso de la kongresejo:

     Pavillon J.-A.-De-Sève
     320, rue Sainte-Catherine Est
     Montréal, QC
     H2X 1L7

-Kunveturado: Ni publikigos en la retejo petojn kaj proponojn pri kunveturado. Sendu al retejo@take7.ca viajn nomon, retpoŝtadreson, urbon, daton de foriro de via urbo, kaj daton de foriro de Montrealo por reveni hejmen, indikante, ĉu vi petas aŭ proponas kunveturadon. Publikante viajn retpoŝtadresojn, ni provos kaŝi ilin kontraŭ spamiloj.

- Partoprenontoj: Ni ĵus atingis 191 aliĝintojn al la komuna kongreso! 64 el Kanado, 71 el Usono, 18 el Eŭropo, 14 el Kubo, 10 el Meksiko, 4 el Suda kaj Centra Ameriko, kaj 11 el aliaj landoj. Vi povas vidi, kiujn aliĝis, ĉe http://take7.ca/aligxintoj.html.

     La preparado de la kongreso bone progresas. Ni antaŭĝojas pro via alveno kaj invitas vin informi viajn amikojn kaj samklubanojn pri TAKE 7! Ankoraŭ eblas aliĝi!

Noto: Regule vizitu la Esperantan sekcion de nia retejo, por vidi la lastajn informojn.

Marteno, nome de TAKE7-LKK

26-a de majo : Kvina novaĵletero sendita (supren)

Saluton!

    Jen la kvina novaĵletero pri la sepa Tut-Amerika Kongreso de Esperanto, okazonta en Montrealo (Kanado) de la 11-a ĝis la 18-a de julio 2008.

- Novaj elstaraj gastoj por la komuna kongreso! Ni fieras anonci la partoprenadon de Hori Yasuo (Japanio), Julián Hernández Angulo (Kubo), Humphrey Tonkin (Usono), Mark Fettes (Kanado) kaj Rubén Ortiz Hernández (Gvatemalo).

- Programo: Ni petas la kongresontojn, kiuj sendis proponon por la programo dum la E-USA kongreso aŭ TAKE 7, ke ili informu nin pri la daŭro de la programero, bezono de teknikaĵoj, preferata tempo por ĝi (tago kaj dato, mateno aŭ posttagmezo...). Ni ankaŭ petas, ke vi sendu duonpaĝan resumon por publikigo en la kongresa libro. Ĉio tio atingu nin kiel eble plej baldaŭ, prefere antaŭ la fino de majo ĉe programo@take7.ca. Antaŭajn dankojn al vi.

- Kongresejo: Nun estas retpaĝo pri la kongresejo: http://www.take7.ca/kongresejo.html. Tie troviĝas informoj pri tio, kiel atingi la kongresejon diversmaniere. Ankaŭ tieas ligilo al nova Guglo-mapo de Montrealo, speciala por TAKE 7! Ĝi indikas la kongresejon, UQAM-Loĝejon, Hotelon Lord-Berri kaj diversajn vidindaĵojn kaj kvartalojn de Montrealo.

- Parkejo: Malantaŭ la kongresejo estas subtera parkejo, kiu kostas po 12 $CAD por ĉiu tago.

- Retejo: Ni aldonis la butonon 'Retejo-Mapo', kiu helpos vin pli rapide trovi informojn pri TAKE 7.

- Antaŭkongresa kaj postkongresa ekskursoj al respektive Kebeko kaj Otavo: Daŭre restas kelkaj liberaj lokoj. Bonvolu mendi rapide antaŭ la fino de majo!

- UQAM-Loĝejo: Ni rememorigas, ke post la 31-a de majo ni ne povos garantii lokon en UQAM-Loĝejo. Se vi mendis, sed ne pagis, bonvolu pagi antaŭ la fino de majo por certigi lokon! Tio ne validas por tiuj, kun kiuj ni interkonsentis, ke ili surloke pagos.

- Kursoj por komencantoj: Informu viajn amikojn kaj samklubanojn, ke dum TAKE 7 estos baza kurso por komencantoj. Jen bona ebleco lerni Esperanton en internacia etoso. La semajna kotizo al TAKE 7 inkluzivas partoprenon al la kurso, do ne necesos ajna krompago. La kurso okazos, nur se sufiĉe da homoj aliĝos al ĝi.

- Ekzamenoj de ILEI/UEA/E-USA: Ne forgesu tuj aliĝi, se vi volas ekzameniĝi dum TAKE 7. La kosto estas 50 $CAD por kovri la ekzamenan materialon. Estos du niveloj, baza kaj meza. Vi ricevos oficialan atestilon pri via lingva kapablo. La ekzamenoj okazos, nur se sufiĉe da homoj aliĝos al ili.

- Partoprenontoj: Ni ĵus atingis 174 aliĝintojn al la komuna kongreso! 62 el Kanado, 58 el Usono, 17 el Eŭropo, 14 el Kubo, 9 el Meksiko, 4 el Suda kaj Centra Ameriko, kaj 11 el aliaj landoj. Vi povas vidi kiujn ĉe http://www.take7.ca/aligxintoj.html. Tie estas eĉ ligilo al Guglo-mapo kun la logxlokoj de ĉiuj aliĝintoj!

    Bonvolu atenti la limdaton je la fino de majo: en junio, la aliĝokotizo kreskos. Tiam, krome, loĝado en UQAM-Loĝejo kaj ekskursoj daŭre mendeblos, sed ni ne plu povos garantii lokon.

    La preparado de la kongreso bone progresas. Ni antaŭĝojas pro via alveno kaj invitas vin informi viajn amikojn kaj samklubanojn pri TAKE 7!

9-a de aprilo : Kvara novaĵletero sendita (supren)

Saluton,

Jen estas la kvara novaĵletero pri la sepa Tut-Amerika Kongreso de Esperanto, okazonta en Montrealo (Kanado) de la 11-a ĝis la 18-a de julio 2008.

Programo: Pli detala programo estos publikata en la retejo post nelonge. Aperos horaro, prelegontoj, temoj kaj aktivaĵoj. Kompreneble ĝi ankoraŭ povos ŝanĝiĝi ĝis julio.

Bankedo: Ne plu eblas mendi la bankedon, ni atingis la limon de 80 personoj. La salono ne povos akcepti pliajn gastojn.

Antaukongresa ekskurso tra Kebekio: Ni havas sufiĉe da partoprenontoj por ĝin okazigi, kaj daŭre restas kelkaj liberaj lokoj. Bonvolu mendi rapide!

Postkongresaj ekskursoj: La postkongresoj al Kebeko kaj al Otavo okazos nur se almenaŭ 6 personoj aliĝos. Ne forgesu ke la limdato estas la 31-a de majo.

Kursoj por komencantoj: Informu viajn amikojn kaj samklubanojn ke dum TAKE 7 estos baza kurso por komencantoj. Jen bona ebleco lerni esperanton en internacia etoso. La semajna kotizo al TAKE 7 inkluzivas partoprenon al la kurso, do ne necesos krom pagi ion. La kurso okazos nur se sufiĉe da homoj aliĝos al ĝi.

Ekzamenoj de ILEI/UEA: Ne forgesu tuj aliĝi se vi volas ekzameniĝi dum TAKE 7. La kosto estas 50$ por kovri la ekzamenan materialon. Estos du niveloj, baza kaj meza. Vi ricevos oficialan atestilon pri via lingva kapablo. La ekzamenoj okazos nur se sufiĉe da homoj aliĝos al ili.

Ekzamenoj de E-USA: Tradicie dum la landa kongreso de E-USA estas lingvaj ekzamenoj en la angla. Se vi volas partopreni ilin, bonvolu indiki tion. Notu ke ili estas malsamaj al tiuj de ILEI/UEA.

Partoprenontoj: Ni ĵus atingis 151 aliĝintojn al la komuna kongreso! 54 el Kanado, 52 el Usono, 16 el Eŭropo, 14 el Kubo, 7 el Meksiko, 3 el Sud-Ameriko, kaj 5 el aliaj landoj. Vi povas vidi kiujn en http://www.take7.ca. Guglo-mapo aperis, kun lokoj de ĉiuj aliĝintoj!

La preparado de la kongreso bone progresas, ni aranĝis la bazan loĝistikon, finpretigas la programon, kaj aldonadas novajn informojn en nia retejo. Ni antauĝojas pro via alveno kaj invitas vin informi viajn amikojn kaj samklubanojn pri TAKE 7!

15-a de marto : Tria novaĵletero sendita (supren)

Saluton,

Jen novaĵoj pri la sepa Tut-Amerika Kongreso de Esperanto, okazonta en Montrealo (Kanado) de la 11a ĝis 18a de Julio 2008.

Retejo: Regule konsultu la retejon por vidi la ŝanĝojn en la programo, la liston de partoprenontoj kaj la novaĵojn: www.take7.ca

Kongresejo: UQAM gastigos TAKE-7-on kaj la E-USA-kongreson! La "Kebekia Universitato en Montrealo" (UQAM) estas la plej granda universitato en franclingvio, kaj ĝi ĉefe fakas pri artoj, komunikado, homaj sciencoj, ekologio kaj politiko. La universitato lokiĝas meze de la t. n. "latina" kvartalo, la kultura centro de Montrealo, kiun ĉirkaŭas diversaj vizitindaj kvartaloj kiel la malnova, la spektakla, la ĉina kaj la geja. Tajpu 'UQAM MONTREALO' ĉe Google Maps kaj vi tuj trovos ĝian situon.

Studentaj loĝejoj: Ju pli rapide vi mendos, des pli bone. Ni ofertas tri kategoriojn inter 55 CAD (kanadaj dolaroj) kaj 110 CAD nokte. Bonvolu noti ke la limdato por rezervi ĉambron en UQAM-loĝejo estas la 31-a de marto 2008. Eblos mendi post tiu dato, sed ni ne povos garantii al vi lokon en ĉiuj kategorioj.

Hotelo: Ni sugestas la hotelon "Lord Berri", kiu apudas la kongresejon (http://www.lordberri.com). Indiku, ke vi partoprenos en "Esperanta kongreso": vi profitos rabaton! Tie okazos la bankedo kaj la estraraj kunsidoj de E-USA.

Bankedo: La bankedo komuna por la TAKE-7- kaj E-USA-kongresoj okazos dimanĉe vespere. Notu, ke la salono ebligas nur al 80 personoj bankedi. Ni vere ne povos akcepti eĉ unu plian personon! Por nur 30 CAD, estos bufedo, kaj JoMo poste koncertos. Ne okazos la anoncita danco pro spacomanko. Ni pardonpetas!

Antaŭkongreso: Ĝi estas limigita al 15 ekskursantoj. Jam 8 aliĝis, do restas nur kelkaj lokoj. Notu, ke ne plu eblas mendi privatan ĉambron kun banejo. Vi malkovros la urbon Kebeko (la ĉarman ĉefurbon de Kebekio, festantan sian 400-jariĝon!), la indianan kulturejon Ŭendake, la historian kebekian vilaĝon en Drummondville kaj la natur-biosferon de Lago Sankta-Petro.

Postkongresoj: Ni proponas du postkongresajn ekskursojn, unu al Kebeko kaj alian al Otavo (ĉefurbo de Kanado). Bonvolu uzi la aliĝilon (paperan aŭ retan) por aliĝi al tiuj ekskursoj. La limdato por aliĝi estas la 31-a de majo 2008.

Ekzamenoj: Okazos ILEI-UEA-ekzamenoj por oficialigi vian regon de Esperanto. Vi devas nepre antaŭaliĝi por rajti ekzameniĝi dum la kongreso. La ekzameno kostas 50 CAD/USD. Tuj skribu al ni, se vi interesiĝas pri tio. Baldaŭ eblos aliĝi al la ekzamenoj pere de la TAKE-7-retejo.

Kursoj: TAKE 7 estas malfermita al ne-Esperantistoj dezirantaj lerni Esperanton. Ne estos plia kosto por partopreni la kursojn: paginte la kongresan kotizon, vi povos partopreni ilin. Informu nin antaŭ la fino de majo kaj varbu viajn amikojn kaj samklubanojn!

Elstaraj gastoj: Partoprenos la fama franca kantisto JoMo, Maritza Gutiérrez González de Kubo, Atilio Orellana Rojas de Argentino kaj José Antonio Vergara de Ĉilio. Vi povos lerni pli pri ili ĉe http://www.take7.ca/gastoj.html.

Partoprenontoj: Nun estas 117 aliĝintoj al la komuna kongreso! 45 el Kanado, 30 el Usono, 15 el Eŭropo, 13 el Kubo, 6 el Meksiko, 3 el Sud-Ameriko, kaj 5 el aliaj landoj.

Multe da laboro atendas la LKK-on por prepari la kongreson, sed ni entuziasme aktivas por pretigi ĉion. Bonan printempon!

5-a de januaro : Dua novaĵletero sendita (supren)

Jen la enhavo de la dua novaĵletero :

Saluton,

    Kvankam vintro apenaŭ komencis oficiale en Montrealo, ni ĵus ricevis trian neĝŝtormon, kun pli ol unu
metro da falinta neĝo entute! Dume, ni, la LKK-anoj, bone progresas en la organizado de la kongreso, sed ankoraŭ
restas multe por fari. Jam restas nur ses monatoj antaŭ la malfermo de TAKE-7 en Montrealo!

    Ni deziras anonci al vi, ke la informoj pri la ekskursoj antaŭkongresaj kaj postkongresa estas disponeblaj en
nia retejo ĉe http://www.take7.ca/. Tiuj ekskursoj permesos al vi viziti plurajn urbojn proksime de Montrealo,
kiel Otavon kaj Kebekon (ĉi lasta festas sian 400-jariĝon ĉi-jare!). Vi do povas aliĝi nun al tiuj ekskursoj
en la ‘Kiel aliĝi’-sekcio de nia retejo, samtempe aliĝante al TAKE-7. Se vi jam aliĝis al la kongreso, uzu la
saman retan formularon, sed alklaku la kvadrateton titolitan "Mi jam aliĝis aŭ ne volas aliĝi".

    Ekde la unua de januaro, la aliĝkotizo de TAKE kreskis de 75 $CAD al 100 $CAD por la tutsemajna kotizo. Kiel
interkonsentite kun la Esperanto-USA estraro, aliĝo al TAKE aŭ al la E-USA kongreso ankaŭ permesos la
partoprenadon al la alia kongreso, sen aldona kosto!

    Ĝis nun 70 homoj aliĝis al TAKE-7! El tiuj, 29 estas de Kanado, 13 de Kubo, 11 de Usono, 8 de Eŭropo, kaj 9
de aliaj landoj. Vi povas vidi la tutan liston en la 'Aliĝintoj'-paĝo de la 'Kiel aliĝi'-sekcio de nia retejo.

    Alia novaĵo: la fama esperantista multlingva kantisto JoMo (Jean-Marc Leclercq) anoncis sin, kaj kantos en
nia kongreso!

Ni deziras al vi feliĉan novjaron, kaj ni esperas vidi vin en 2008 dum TAKE!

14-a de oktobro : Unua novaĵletero sendita (supren)

Jen la enhavo de la unua novaĵletero :

    Mi ĝojas sendi al vi la unuan novaĵleteron pri la 7-a Tut-Amerika Kongreso de Esperanto. La Loka Kongresa Komitato renkontiĝis jam dekfoje por organizi la plej bultan, interesan kaj entuziasmigan kongreson eblan!

    Jam 18 homoj kompletigis sian aliĝon al nia kongreso, 9 monatojn antaŭ ĝia inaŭguro. Tio feliĉigas nin, kaj kuraĝigas nin por organizi kaj plani la kongreson. Estas tempo varbi pri la kongreso, precipe al eksternordamerikanoj, por ke ili povu ĝustatempe plani sian vojaĝon al Montrealo, ĉefe pri vizoj kaj invitleteroj.

    La LKK sukcese skribis la provizoran programon de la kongreso, havebla en nia retejo. Estas planataj du spektaklaj vesperoj, unu kebekia, kaj alia latinamerika, kaj filma vespero en la kinejo de la Naci-Filma Oficejo, prezentante senparolajn filmetojn. Unu vespero estas rezervita por ĝui la montrealajn festivalojn kaj aktivecojn ekstere, kun gvidantoj. Partoprenantoj povos ĉeesti bankedon, kun aldona kosto. Finfine, duon-tagaj ekskursoj okazos tra nia urbo. Por tiuj kiuj volas ĝui pli de Kebekio, ni okazigos kvin-tagan antaŭkongreson tra kvar urboj, kaj du-tagan postkongreson al Kebekurbo, festante ĝian 400-jariĝon.

    En la retejo de TAKE7, vi nun povas malkovri la kongresurbon trimaniere: legante 'sciindaĵojn' pri Montrealo kaj de ĝia loĝantaro, priskribante kutimojn kaj servojn de la urbo; vizitante la urbon 'virtuale' tra multaj fotoj kaj priskriboj rilate al ĝiaj buntaj kvartaloj kaj ĝia historio; kaj spektante filmetojn pri Montrealo kaj ĝiaj historio, festivaloj kaj kulturo.

    Vortfine, mi ŝatus diri al vi ke gravas via partopreno por certigi la sukceson de TAKE7. Ne hezitu komuniki al ni demandojn, ideojn kaj sugestojn, ĉu pri la retejo, pri la programo, aŭ aliaj aferoj; ni provos plejeble helpi al vi veni kaj ĝui la kongreson, kaj kontribuigi vin al ĝi. Ne estas nur nia kongreso, sed ankaŭ via! Kaj eĉ ĉies! Ni bonvenigas vin en Montrealo!

1-a de aŭgusto : Novaj reklamiloj (supren)

Helpu nin diskonigi TAKE7-on per la jenaj novaj reklamiloj.

Informfolio	Afiŝo Reĝa monto	Afiŝo Riopel-fontano	Afiŝo Ŝtona fono	Afiŝo Simpla	Bildeto por retligiloj
				(kolora versio) (griza versio)	(120x60) (160x80) (320x160)

1-a de julio 2007 - Oficiala lanĉo (supren)

Bonvenon al la retejo de TAKE7! Post iom pli ol unu jaro, okazos tie-ĉi en Montrealo la Sepa Tut-Amerika
Kongreso de Esperanto. La Loka Kongreskomitato jam komencis labori de pluraj monatoj por prepari tiun
eventon. Kiel vi vidas, la retejo jam havas bazajn informojn, inkluzive de aliĝilo. Ankaŭ prezentiĝas skeleto
de la planata programo, servoj provizotaj de la LKK kaj informoj pri la gasturbo Montrealo.